XXIV
Tiña inmellorábeis condicións. Un
apartamento con vistas a Sussex Gardens Street, tranquilidade total, Mrs.
Worthing atenta a canto puidera necesitar... O marco ideal para pórme a
escribir. O primeiro sería deixarme levar por As regras de ouro da novela contemporánea.
“O
escritor moderno, para levar adiante a súa tarefa, debe procurar ante todo non
deixarse arrastrar pola improvisación. O exercicio literario é, principalmente,
un xogo con claras regras que deben seguirse se non se quere caer na
mediocridade. Dez son os puntos básicos do proceso, que se irán describindo con
detalle ao longo deste traballo:
1.
Idea
2.
Argumento
3.
Personaxes
4.
Sinopse
5.
Despece por escenas
6.
Localizacións
7.
Documentación
8.
Primeiro borrador
9.
Reescrituras
10.
Manuscrito final
A
disciplina empregada no seguimento estrito desta estrutura dará como resultado
un produto que colmará os seus desexos literarios, e chegará ao lector coa
calidade necesaria para que vostede atope un lugar na narrativa contemporánea.
Neste libro verá como cen días son suficiente para crear unha grande novela”
Cen días! E non habería un método
abreviado? Entrarían dentro dos cen días os necesarios para ler e estudar o
manual, ou eses ían a parte? Saltei o resto da introdución e fun ao gran.
“A
idea. Que me inspira?
A
idea é o primeiro paso da construción narrativa. Debe expresarse nunha única
frase e debe responder á pregunta: que quero transmitir?”
Ai, que carallo! Iso xa o sabía eu. Non
facía falla que mo explicaran. O malo é que non acudía ningunha idea. Pensei
basearme nas experiencias vividas nos últimos anos, pero non daba atopado a
maneira de contalo sen separar todo aquilo que tiña relación co meu traballo.
Co meu antigo traballo. E tiña claras dúas cousas: unha, que non quería parecer
o mordomo traidor que sae nas revistas. Outra, que a boa hora podería publicar
as interioridades do meu xefe.
As miñas aventuras amorosas tampouco tiñan
moito que contar, fóra a alma. Por tanto, quedaba excluída calquera cousa
autobiográfica. O mellor sería provocar unha choiva de ideas e pillar a
primeira que parecera aproveitábel. Seguín lendo.
“Unha
vez que temos a idea, hai unha serie de cousas a ter en conta, o ton do libro
–se vai ser serio, humorístico- a extensión que pretendemos darlle, xa que non
é o mesmo un relato ca unha novela curta ou unha longa, o estilo –frases curtas
e directas ou longas e descritivas-, a técnica a empregar –narración en
primeira, segunda ou terceira persoa, texto clásico- e, por último, a estrutura
que lle imos dar á obra –capítulos, bloques, todo seguido-...”
A cousa púñase máis difícil do previsto.
Máis que axudarme, o manual aquel aínda complicaba máis a cousa. Aínda non
comezara, nin sequera tiña unha idea, e xa debía responder a unha morea de
cuestións que parecían fundamentais. Mrs. Worthing petou á porta.
- I thought you would like a cup of tea.
- Thank you very much. Do you speak my
language?
- Oh, no. I´m sorry, sir.
- Pois a ver como nos entendemos vostede e
máis eu, que esa é outra!
- ...?
- Nothing. Thank you.
Un parvo coma min perdido nunha cidade
estranxeira. Unha idea. E agora, a matinar o argumento. Viña pola páxina trinta
e sete.
“Argumento:
que conto? En xeral, debemos describir o argumento en poucas liñas. Unha
ferramenta moi útil é manter unha base de datos de argumentos para as nosas
futuras novelas, e ir apuntando os que se nos ocorran lendo revistas,
espreitando na vida diaria, etc. Unha vez escollido un, resulta imprescindíbel
estudar argumentos alternativos, pois as cousas pódense contar de varias
maneiras.”
Ben. E que máis? Comezaba a doerme o
diñeiro gastado naquela sarta de cousas obvias. Se, ao final, todo o tiña que
facer eu! Volvín ao índice e boteille unha ollada.
“Personaxes:
de quen estou a falar?”
Personaxe xa o tiña. O parvo. Así que,
páxina corenta e cinco.
“Debemos
construír unha ficha para cada unha das personaxes que empreguemos. Un modelo a
seguir podería ser o seguinte:
-
Nome:
-
Alias:
-
Lugar de nacemento:
-
Nacionalidade:
-
Domicilio:
-
Estado civil:
-
Profesión:
-
Importancia: (protagonista, antagonista, principal, secundario)
-
Ton: (serio, cómico, dramático)”
Era o que me faltaba por ver. Tiña que
facerlles o DNI ás personaxes antes de escribir a novela! Na altura tiña para min
que aquilo era unha verdadeira carallada. Collín As regras de ouro da novela contemporánea e tireino no cubo do
lixo. Alí estaba ben.
Para desconectar abrín a caixa do correo
electrónico. Tiña unha mensaxe de Tareixiña.
Porfa,
non te esquezas de pasar por Harrod´s e mércarme todas as variedades de té que
podas. Pásao moi ben, e non te preocupes polo do choio. Xa atoparás outra
cousa. Bicos.
Mañá iría buscarlle o té. E de paso a dar
unha volta pola cidade, para cando menos coñecela un pouco. Xa case levaba tres
días e todo o que coñecía era unhas dependencias policiais, unha funeraria e o
cuarto do hotel, ademais do apartamento de Rosa. Tiña tamén mensaxe dela.
Agardo
que te atopes a gusto. Eu teño un día horroroso, pero non me queixo. Non me
lembrei de dicirche que non contestes ao teléfono. O mellor é que o descolgues.
No frigorífico tes de todo, pero calquera cousa que precises pídeslla a Mrs.
Worthing. E, por favor, non aturo a desorde. Colle o que queiras, pero cando
remates vólveo ao seu sitio. Aquí agardamos rematar antes do sábado, aínda que
nunca se sabe. Se iso, heite chamar con tempo. Saúdos
O último era da deputación.
Estimado
Sr.: Tendo rematado a relación laboral que viña mantendo con este organismo,
prácenos comunicarlle que ten ao seu dispor a nómina correspondente ao último
período, a liquidación de fin de contrato así como os certificados de
cotización. Pode pasar polo negociado de persoal cando mellor lle conveña.
Agardando as súas noticias, reciba un cordial saúdo.
Era a confirmación definitiva de que non
había volta atrás. Non a precisaba, pois logo de todos aqueles anos sabía
perfectamente como as gastaba o xefe. Despedido era despedido. E punto. Sen
máis voltas. Pero afastei a cuestión do pensamento. Xa tería tempo a semana
vindeira para tramitar os papeis.
Aquel día estaba xa perdido, así que
decidín dar unha volta polas proximidades a ver se algunha idea me acudía,
caritativa, ao maxín. Cruceime con ducias de turistas que entraban na multitude
de hoteis establecidos naquela longa rúa. Moitos deles falaban linguas
coñecidas. Pensei que o mundo xa non era lugar para aventuras, senón para o
turismo. Así que tampouco unha novela de viaxes. Ademais, vaia experiencia a
miña, que era a primeira vez que pisaba o estranxeiro. Ben, quitando Portugal,
se o consideramos “o estranxeiro”.
XXV
Levaba tres días no apartamento de Rosa
sen o menor resultado. Un perdido co manual para parvos, o outro de compras por
Harrod´s e de visita polos lugares máis céntricos: Buckingham Palace, o
Parlamento, Times Square, o London Eye, etc. O terceiro estaba a transcorrer
sen maior novidade.
Soou o meu teléfono.
- Iago. Son Rosa. Ao final imos rematar
mañá, así que chegarei á noite. Como vai o traballo?
- Mal, moi mal. Non teño unha soa liña.
- Non desesperes.
- Abóndame para saber que non sirvo para
escribir ficción.
- Pois eu penso que si vales. Dámo a alma.
Só tes que atopar a inspiración.
- Es unha optimista.
- Non te preocupes. Teño unha idea que che
quero comentar. Vémonos mañá.
Unha idea? Rosa? Imaxinábaa. Co odio que
lle tiña ao marido probabelmente me diría que escribira sobre el. E xa dixen
por que non me parecía intelixente meterme naquel sarillo. De todos xeitos
estaba tan bloqueado que me rendín definitivamente. Apetecíame perder o tempo
por algures. Quizais a National Gallery.
Rosa Fole chegou o xoves á noite. Tíñalle
pedido a Mrs. Worthing unha cea fría, pois non sabía a hora exacta. Mercara
unha botella de viño tinto alentexano –ao branco tíñalle noxo despois daquel
día fatídico- nunha tenda rexentada por uns portugueses. Deixou as cousas e
ollou agradecida para a mesa posta.
- É un detalle. Grazas.
Faloume do seu traballo e da volta que
viña de dar por Gales. Parecía satisfeita coa súa nova vida lonxe de todo canto
quedaba atrás. Pero non esquecido.
- Xa che dixen que teño unha idea...
- Antes de que fales, quero dicirche que
non vou escribir nada sobre Francisco Barreiros. Nin cambiando os nomes, nin
disfrazando a historia, nin nada. Xogaríame o futuro e, ademais, non creo que
ninguén o publicase.
- Xa vexo que pensaches en todo.
- Tiven tempo abondo.
- Pero quizais non lle deses voltas
bastantes ao tema.
- Non entendo.
A súa cara amosaba un pícaro sorriso. Ela
si matinara a fondo sobre a cuestión nos días anteriores. Víase segura de si
mesma.
- O que ti facías até agora era, máis ou
menos, darlle forma ás ideas de outros, non?
- Eu non o diría así. Ideas, o que se di
ideas... máis ben catro ou cinco tópicos ben traballados.
- O caso é poñelo en papel. O que sexa.
Non conseguía entender a onde quería ir
parar. Pedinlle que fora dereita ao gran.
- Eu si quero contar a miña historia. A
dunha muller burlada. Expor todo o maltrato ao que me someteu ese cabrón, e que
a xente saiba que clase de persoa é. Quero que ti a escribas. Podemos asinalo
os dous, ou podo facelo eu soa. Iso dáme igual
Quedei sen palabras. Era xenial! A ela
dáballe o mesmo que consecuencias puidera ter aquilo e, despois de todo,
tratábase principalmente da súa vida. Ninguén lle podía negar o dereito a
desafogarse. Máis dun editor rifaría por algo así. E, este era un obxectivo
común, podiamos meter nunha lea a Panchito Barreiros.
- Acepto.
- Pois entón, mans á obra. Non hai tempo
que perder.
Comezamos aquela mesma noite. Rosa foime
relatando unha longa rea de desprezos, insultos, ameazas e infidelidades.
Decidimos darlle un ton irónico e case humorístico, afastado da traxedia que
lle tocara vivir. Parecíame que así situaríamos ao imbécil nun plano inferior
ao da muller, resaltando enormemente a súa estulticia. Usariamos os nomes
reais, sen agochar nada.
Un episodio realmente sorprendente para
min foi a narración da reacción de Barreiros cando Rosa tentou que se sometese
ás probas de fertilidade. Era tan descritivo do seu carácter, que insistín en
que aquela comida na casa dos sogros tería que ser o comezo da narración. Logo
saltariamos cara atrás, e seguiríamos unha certa orde cronolóxica. Coido que
non tardei nin dúas horas en entusiasmarme co prometedor proxecto.
Tanto, que non saímos do apartamento
durante catro días. Rosa non tiña traballo até o martes seguinte, e todas as
necesidades cubríaas unha solícita Mrs. Worting que amosaba unha especial
simpatía agora que sabía que eu era escritor, e que estabamos a traballar xuntos.
Adoraba a literatura e estaba feliz de ter un autor na súa casa.
Dedicamos unhas dezaoito horas diarias á
tarefa, comendo sobre a marcha. Rematabamos tremendamente cansos e algún día
quedamos durmidos diante do ordenador. Mais o texto avanzaba a paso de xigante.
O plan de traballo que foramos improvisando consistía en facer unha narración
inicial sen pulir, en bruto, que eu puliría de volta na casa con máis calma.
Despois podía volver a Londres, ou ben enviarlle o texto refeito por correo
electrónico para darlle os últimos retoques. Manteríamos entre tanto o contacto
telefónico, para que ela puidera estar ao tanto.
- Rosa. Algunha vez che levantou a man?
- Si. Por iso marchei.
Á fin dos catro días tiñamos unhas vinte e
cinco mil palabras, se ben nun borrador pouco estruturado e cheo de grallas,
erros tipográficos e sen estilo ningún. Sacamos dúas copias, para que ela tamén
puidera traballar sobre o texto.
- Ves como si es un escritor?
- Así calquera. Isto non é ficción.
- É unha historia. Hai moitas máis. Tantas
coma persoas, non?
- Se o miras dende ese punto de vista...
- Claro. Que outro pode haber? A xente
quere narracións que poda entender, próximas á experiencia propia. A literatura
fantástica está ben para nenos.
- Cada quen ten os seus gustos. Pero coido
que tes razón. Agora queda comprobar se son capaz de darlle forma.
- Estou segura.
XXVI
A entrada de Francisco Barreiros
representou un sopro de ar fresco no anquilosado goberno. Era un político de
raza, capaz de facer que se falara del, fora ben ou mal, e que non abandonaba a
primeira liña mediática por nada no mundo. Non precisou sequera achegar
proxectos novos, ou unha liña de traballo distinta á do seu predecesor.
Simplemente pillou todo o que circulaba xa pola consellaría e inundou os medios
de comunicación con todo aquel material, dando a sensación de que ía cambiar de
arriba a abaixo toda a política levada a cabo até alí.
Iso e mailo uso intensivo do coche
oficial, ao que xa estaba afeito. Estendeu as redes por todo o país visitando
cooperativas, fábricas, matadoiros, mercados, granxas, sindicatos agrarios,
alcaldes e, sobre todo, festas gastronómicas. Fronte aos seus compañeiros de
goberno menos populistas, xustificábase dicindo que alguén tiña que dar unha
imaxe de proximidade ao pobo. E ninguén mellor ca o conselleiro de agricultura,
por aquilo da secular tradición agropecuaria da comunidade.
O mesmo presidente concordaba coa súa
opinión. Até entón o goberno parecía dar a sensación de ser un grupo de
tecnócratas afastados da xente. Eficaces, ao seu xuízo, pero non demasiado
populares.
Así que atopou o campo libre e preparado
para a semente, para asentar as bases do futuro sobre unha clientela ganada
para a causa. Por iso tiña que dicir a todo o mundo o que querían oír. Debía
procurar favorecer a todos, telos contentos e agradecidos a aquel conselleiro
que, á fin, “era un dos nosos”.
Soubo ganar aos directores dos medios
cunha mestura de atencións e o incremento exponencial dos orzamentos da
consellaría destinados a publicidade institucional, e moi axiña chegaron os
columnistas que loaban a súa capacidade política, o pulo de modernidade que
estaba a imprimir nun sector tan atrasado e tan vital para o país.
Foi un daqueles plumiñas, o de máis sona,
de quen tirou para substituír a Loureiro na cuestión dos discursos e outras
parrafadas. Saía moitísimo máis caro, por suposto, pero en calidade non había,
ao seu xuízo, punto de comparación.
Estaba onde quería e co mundo, con aquela
pequena parte do mundo, aos seus pes. Cando sentiu suficientemente segura a súa
posición, quixo retomar outras cousas onde as deixara. Pero agora, podía facelo
ao grande. Chamou ao director da televisión autonómica.
- Nóvoa? Son Barreiros. Preciso que me
faghas un favor. Trátase dunha recomendada miña que...
XXVII
Traballando no texto xa de volta á cidade,
a preocupación máis importante que me asaltaba non tiña nada que ver cos
aspectos formais e tampouco cos de fondo. Seguía a empregar aquel ritmo
compulsivo iniciado no apartamento de Sussex Gardens, e cheguei a pensar que
corría grave risco de rematar intoxicado.
Son fumador de maneira case irremediábel,
logo de abondosas tentativas de abandonar o hábito, sempre sen éxito. De todas
formas, o meu consumo habitual non pasa dun paquete diario, agás raras
excepcións. Sen case decatarme, asusteime ao ver o ritmo de consumo cando caín
na conta de que estaba a abrir o segundo paquete do día, e non eran máis que as
tres da tarde. Fixen entón contas e calculei que, diante da pantalla, estaba a
fumar unha media de vinte cigarros cada cinco horas de traballo. Por iso sentía
a boca sempre como se estivera a comer un cinseiro. O salón do meu apartamento,
se un o comparaba entrando e saíndo noutras estancias, permanecía envolto nunha
densa néboa, os dedos fura-bolos e maior-de-todos presentaban unha coloración
marrón escura preocupante, e ollándome ao espello comprobei que tiña os ollos
moi irritados.
Pero a cousa ía ben. O material en bruto
daba pé para un desenvolvemento moi interesante, e quería aproveitar a
inspiración antes de que desaparecera. Nin sequera pasara pola deputación para
recoller os papeis, nin chamara a Tareixiña para dicir “estou aquí”. Íame
alimentando de pizzas pedidas por teléfono, cervexa e café, moito café. Despois
de varios días presentaba unha mesta barba, o cabelo revolto e graxento, e
incipientes problemas gastrointestinais.
Só me recompuxen ao lembrar que debía
acudir ao xulgado para o xuízo polo accidente. De milagre. Estaba a escribir
unha escena de grande violencia verbal, non sei por que me veu á cabeza Chus, e
logo a cita pendente coa xustiza. Unha cousa foime levando á outra. Menos mal.
Presenteime limpo, barbeado e ben vestido,
con traxe e garabata, para axudar a abrandar á, neste rol, xuíza Cordeiro.
Agardaba paseando nervioso por un corredor cando a vin achegarse cara a min.
Púxenme algo nervioso.
- Ola, Iago. Hoxe é o día, non?
- Si. Agardo que non me fagas moito a
pascua.
- Eu? Para nada. O teu caso non me toca a
min.
- Non?
- Pero non te preocupes, falarei co xuíz
para que non sexa moi estrito, cunha condición.
- Chus. Que te vexo vir!
Tiña aquela ollada de femia dominante que,
por experiencia, xa me asustaba.
- Aínda non dixen nada. Só che pido que
tomemos un café despois da vista. Simplemente iso.
- De acordo, pero só se a cousa sae
razoabelmente ben.
Non se pode dicir que non. O xuíz, un home
de sesenta e tantos anos con pinta de estar permanentemente anoxado, non cargou
demasiado as tintas. Seis meses de suspensión do permiso de conducir e unha
pequena multa. O cargo por ameazas a un axente da autoridade foi finalmente
desestimado, xa que considerou a frase “vostede non sabe con quen está a falar”
unha expresión corrente e habitual nunha situación deste tipo. Xa que logo, a
cita con Chus era inevitábel.
- Onde estiveches todo este tempo? Mudaches
de cidade co ascenso do teu xefe?
- Que dis! Despediume uns días antes de
que o nomearan conselleiro. Estou sen traballo.
- Non sabía. Non chamaches máis. Supuxen
que me gardarías a faena de mandarte para os calabozos. Es un pouco rancoroso.
Non daba creto. Como non ía gardarlla? A
ela parecíalle un xogo nada máis o que para min era outro desastre na longa
lista dos acaecidos naqueles días ben difíciles.
- Chus. Ti velo como unha brincadeira,
pero a min chegoume moi fondo. Como queres que non me sinta mal?
- Bah! É unha anécdota que algún día
poderás contarlles aos netos.
- Rematarás conseguindo que te odie.
- Por favor, non digas iso. Agora voute
coñecendo e xa me decato de cales son os teus límites. Coido que te entendo un
pouco mellor.
- E precisabas meterme na cadea? Iso non
lle gusta a ninguén, non fai falla experimentalo para sabelo. Sen embargo, a
min pásame todo o contrario. Cando estabamos... o que fose aquilo que faciamos,
cría coñecerte bastante ben. Agora non teño nin a máis remota idea de que vas.
- E que imaxe tiñas entón?
- Prefiro non responder a iso. Estou no
meu dereito, non?
Soltou unha gargallada. Parecíame que
estaba a xogar comigo dende que nos atopáramos e, para iso, eu semellaba ser a
vítima ideal.
- Ti o que precisas non é un compañeiro,
senón un boneco, un obxecto para as túas brincadeiras. Pois ben, mesmo sen ser
consciente fixen o meu papel, e creo que con moito éxito, por certo. Pero
compadezo ás próximas vítimas. Non é nada agradábel.
- Iago, penso que estás trabucado. Non
houbo máis ca dous accidentes imprevistos. Levei unha sorpresa cando te vin no
xulgado aquela noite.
- Si, foi unha casualidade. Como que non
houbera condóns. Pero ben que aproveitaches as dúas situacións para xogar o teu
xogo.
- Se o queres ver así... E agora, que vas
facer da túa vida?
Non quixen contarlle en que andaba metido.
Respondín o máis obvio.
- Non sei. O que xurda. Deixarei pasar
algún tempo e buscarei traballo. Ao mellor preparo algunha oposición. Xa verei.
- Estás con alguén?
- Impórtache?
- É por saber. Preocúpome por ti, nada
máis. Gustaríame que as cousas che saíran ben. Merécelo.
Deslizou unha man por riba da mesa mentres
dicía isto, e agarroume dous dedos da miña. Os que delataban o recente
tabaquismo esaxerado.
- Non estás fumando moito?
- Si. Non paso por unha boa época, que
queres que che diga.
- Deberías confiar en min. Ao mellor podo
servirche de apoio.
- Ti?
- Proba.
Nin tolo. Aquela muller levaba un sinal de
perigo na fronte. Comecei a inquietarme e a desexar perdela de vista para
sempre. Pensei na mellor maneira de cortar a conversa e saír pitando.
- Ben, Chus. Desexo que che vaia ben...
- Agarda! Que présa tes? Estás no paro,
non?
- Teño cousas que facer.
- Non terán tanta urxencia. Queda un pouco
máis.
- Teño que ir á deputación recoller os
papeis do despido e...
- Se non fuches até agora supoño que
poderán esperar algún tempo.
Tiña razón. Era unha muller intelixente,
sen dúbida. E sabía como levar as cousas polo seu rego. Non me quedaban senón
dúas alternativas: cortar en seco ou aguantar un pouco máis. Adiantouse.
- Por favor, póñanos outros cafés. O teu
era cortado, non?
E volveu ao ataque. Estaba a controlar o
xogo, como sempre.
- Que tal andas de cartos. Precisas que
che preste algo?
- Non. Teño algún aforro, grazas. En todo
caso, tamén podo recorrer aos meus pais.
- Xa imaxino, pero non é o mesmo. Non
dubides en pedirme o que faga falla. Se queres tamén me podo mover un pouco no
tema do traballo.
- Non, de verdade, Chus.
- Tanto me odias?
Unha pregunta que me descolocou. Odiábaa?
Non o sabía con certeza. Púñame nervioso, estaba moi anoxado polo que me
fixera. Pero odio...
- Sinceramente, non o sei.
- Pénsao un pouco. Gustaríame sabelo.
A conversa collía un camiño un tanto
absurdo. Que lle ía dicir? “Si, ódiote” era case unha declaración de guerra, e
á miña forma de ser non lle cadraban afirmacións tan rotundas. Por outra banda,
“non te odio” significaba espirme aínda máis, se iso era posíbel, diante
daquela estraña muller. Ás veces o pensamento é máis rápido ca un mesmo.
- Creo que non.
- Cres? Non tes a certeza?
- Chus, por favor, tanto importa?
Para min era imposíbel unha declaración
menos suspensiva. Tería que conformarse coa suposición. Naquel momento tiña a
urxencia absoluta de marchar. Non aguantaba máis.
- Si, importa. Sabes, Iago? Dicías que
antes crías coñecerme. Penso que nin eu mesma me coñecía ben.
- Chus...
- Non digas nada, escóitame. Creo que
estou namorada de ti...
Sem comentários:
Enviar um comentário