XII
Non podía pegar ollo a véspera da
inauguración da exposición gandeira provincial. Semella unha parvada, pero fora
tanto o esforzo despregado naquelas dúas semanas que todos desexabamos que
resultara perfecto. Iso sen contar que, dado o nivel de estres que tiñamos
todos, comezando polo xefe, calquera erro ía desencadear unha treboada. No
círculo máis inmediato do presidente, os que tiñamos precarios contratos de
asesores intuíamos incluso que os nosos empregos pendían dun fío. O máis mínimo
descoido custaríanos o posto.
Repasei mentalmente aquela morea de
convidados: o presidente do goberno autonómico e sete conselleiros, incluído o
desgraciado de agricultura, pobre. Varios presidentes de deputacións, varias
ducias de deputados autonómicos, os alcaldes das oito cidades máis importantes,
un arcebispo, tres bispos, dous cónsules, o presidente do tribunal superior de
xustiza e os maxistrados da audiencia provincial, o xeneral xefe da rexión
militar, o comandante en xefe da Garda Civil, o subdelegado do goberno central,
os directores dos principais medios de comunicación, os secretarios xerais de
todos os sindicatos agrarios, presidentes de múltiples asociacións veciñais,
deportivas, culturais, de mulleres rurais, de viúvas, de amas de casa, de
pescadores. E un longo etcétera.
Tiñamos comprometidos máis de cincuenta
autobuses de toda a provincia e serviríanse non sei cantos milleiros de quilos
de polbo, empanadas e carne ao caldeiro. Todo de balde. Para as autoridades e
convidados montárase unha enorme carpa con ringleiras de mesas corridas, e os
dous mellores restaurantes da cidade ían servir un luxoso xantar.
Os problemas loxísticos non conseguiran
desbordar a nosa capacidade de traballo, e estabamos satisfeitos de dar
organizado todo aquilo en a penas quince días. Pero aínda quedaba o peor, o
grande día.
Á unha e media da mañá soou o teléfono.
- Loureiro, tes que vir iso fato. Estiven repasando o discurso e
creo que temos que darlle unha volta a alghunhas cousas.
- A esta hora?
- E cando queres que o faghamos, mañá?
Cando xa teña pasado?
- Ten razón. Paso pola súa casa?
- Non. Apunta este enderezo: Rúa da
Oliveira, corenta, sexto dereita.
Apañei o ordenador portátil e saín
pensando que a Rúa da Oliveira tiña que estar na zona nova da cidade, inzada de
novos predios. Os do concello non demostraran unha especial orixinalidade
bautizando rúas: da Oliveira, da Figueira, da Maciñeira, da Pereira... E máis
alá a da Rosa, do Caravel, da Margarida... Para non perderme na floresta pillei
un taxi, aínda que o taxista tampouco tiña moita idea e tivo que preguntar por
radio á central.
- Marisiña, por onde queda a Rúa da
Oliveira. Cambio.
- Debe ser unha desas novas, no polígono
de Airiños. Cambio.
- Supoño, pero cal?
- Nin idea. A ver, algún compañeiro que
nos indique a Rúa da Oliveira, repito, Rúa da Oliveira. Cambio.
O taxista desculpouse. –A ver se algún
colega...- Pasou un intre e oírse outra voz pola radio.
- A ver ese que pregunta pola Rúa da
Oliveira. É a segunda entrando pola Avenida dos Castros. Hai unha pizzería
xusto á entrada. Cambio.
- OK, moitas grazas.
Non precisaba moita imaxinación para
entender que facía o xefe nunha casa que non era a súa a aquela hora da noite.
Un ligue. Que cabrón máis afortunado. Custaba traballo entender como aquel
anano vulgar puidese ter tanto éxito coas mulleres. Aínda que, se ben se mira,
tiña cartos e poder. Para algunhas podía ser suficiente.
Abriume o xefe a porta. Levaba unha bata
curta e deixaba ver as pernas cheas de peluxe. Mandoume pasar para un salón e,
axexando, puiden ver ao pasar por diante dunha porta unha perna feminina que
asomaba por riba do cobertor. O apartamento tiña poucos móbeis. Parecía que
estaba a medio equipar. Un cadro de estilo puntillista apoiaba contra unha
parede pintada de azul escuro, a única das catro en tal cor. Un león rampante
de bronce, de bo tamaño, pousaba enriba dunha mesa de vidro asentada en
cabaletes lacados en negro. A única luz proviña dunha lámpada cúbica alaranxada
que pousaba no chan.
- A ver, estiven revisando isto e temos
que quitar algunhas cousas que non me convencen.
- Dígame, logo.
Traballamos máis de dúas horas. Don
Francisco baixou case media botella de uisqui nese tempo. Refixemos de arriba a
abaixo boa parte das vinte e tantas follas, cortando, pegando, trocando
palabras que cría que se lle podían resistir, introducindo cousas novas. Ao non
dispor de impresora non puido quedar cunha copia, polo que leu e releu na
pantalla do ordenador até que pareceu darse por vencido.
- Pois aínda non acaba de ghustarme.
- Aínda lle podemos dar unha volta a
primeira hora.
- Non. Temos que rematar aghora. Non quero
deixar isto pendente.
Xa non podía coa canseira cando, non
contento de todo, o xefe me mandou marchar.
- Aghora xa vai. Que saia como queira.
Veña, vaite deitar! Mañá quérovos a todos frescos, caghonodemo!
Eran case as catro da noite. Na rúa caín
na conta de que non había taxis pola zona, así que decidín volver andando á
casa. Facendo un pouco de exercicio ao mellor conseguía pillar o sono e durmir
unhas horas, até as sete e media que tiñamos que estar no recinto feiral.
Nin sequera me deitei na cama. Estaba
rebentado, pero sen sono. Prendín a televisión e mirei un deses longos anuncios
dun aparello ximnástico milagreiro, seguido de outro dun robot de cociña. E
despois outra vez o aparello, presentado por dous atléticos actores americanos,
un home e unha muller. Con só dez minutos diarios vostede tamén pode conseguir
un corpo dez. Chame agora e obteña o super-mega-ultra-aparello por este
incríbel prezo. Recomendado pola asociación americana de preparadores físicos.
Pillei un traxe, camisa, garabata e roupa
interior e coloqueinos enriba da cama. Abrín a billa da ducha e deixei correr a
auga mentres me barbeaba. Pasei máis de vinte minutos na ducha, tratando de
despexarme. Sentía que se me pechaban os ollos. Eran as sete e vinte e cinco
cando cheguei ao recinto feiral. Precisaba un café.
XIII
O cadáver xacía a poucos metros dunha sala
de moda nas Docklands. Estaba rodeado de paramédicos, policías e curiosos, de
luces azuis destellantes e sons de transmisións de radio. Tiña todas as pintas
dunha sobredose. Un sarxento rexistraba os petos na procura de documentación.
Sacou cinco libras e uns poucos peniques, un papel cun número de teléfono e un
bono de transporte. O morto levaba unha cadea de prata cunha pequena cruz e un
reloxo negro de plástico. Vestía unha camiseta verde co logo anarquista,
vaqueiros raídos e deportivas baratas. Os axentes interrogaban aos curiosos
para ver se alguén coñecía a aquel home, sen resultado. A equipa científica
tomou fotografías, as pegadas dactilares do cadáver e a temperatura do fígado
para establecer a hora da morte. Cando remataron, introducírono nun furgón
negro.
A policía foi tirando do fío por medio do
número de teléfono aquel. Pertencía a un coñecido traficante difícil de pillar.
- Non queremos nada contigo. Dime só se
coñeces a este. –O detective ensinoulle unha foto-
- Coñezo, pero non sei grande cousa. É un
español. Coido que vivía por Hackney con outros squatters. Nada máis.
Eran datos suficientes para seguir
desenleando a madeixa. Unha exhaustiva procura entre os okupas do distrito
ofreceu, á fin, a identidade e maila procedencia do morto. Scotland Yard
contactou coa Interpol para que a policía española atopara algún familiar de
Ernesto Fole para lles comunicar o suceso e que puideran dispor o que
considerasen oportuno.
XIV
Mamen destacaba entre os xornalistas que
andaban á captura de declaracións na selva de políticos. Levaba un micrófono co
logotipo do Ideal unido por un cabo
umbilical á cámara que portaba un rapaz alto de longa barba. Á fin, o xefe
conseguiralle o traballo na produtora do xornal da cidade. Creárana coa idea de
pór en marcha unha televisión alternativa a Telecidade, pero o proxecto non
daba arrincado. Mentres, a empresa facía crónicas para axencias.
Os homes laranxa da protección civil
organizaban o tránsito e derivaban os centos de automóbiles. Autoridades, para
a explanada asfaltada situada a carón do recinto. Os demais, para o terreiro
explanado polas escavadoras da deputación nos días previos situado a carón do
río. Os autocares debían descargar os pasaxeiros e seguir camiño un par de
quilómetros máis alá, para aparcar cabo do campo de fútbol.
Don Francisco recibiu persoalmente a todos
os convidados importantes repartindo apertas, cumpridos e alabanzas, en grao
maior ou menor en función da relevancia de quen tiña á fronte. Despois as
azafatas ían acompañándoos cara ao recinto habilitado para a cerimonia de
inauguración, onde había mesas dispostas con café, galletas, augas minerais e
zume de laranxa.
A cousa estaba a funcionar. Os que
compúñamos a equipa de protocolo andabamos espallados controlándoo todo para
pór coto a calquera problema que puidera xurdir. Varios grupos de gaitas
ceibaban pezas diversas que se mesturaban no ar. As percusións escocesas
facíanse pesadas de máis. Tiñamos un día de primavera magnífico, radiante e soleado.
A coral que eu abandonara despois do
fracaso melódico, e tamén do aventureiro, cantou o himno de forma solemne.
Evitaba ollar para o grupo de voces para non ter que cruzar a ollada con Chus.
De todas formas, botei furtivas visuais buscándoa na parte das sopranos. Non
estaba. Don Francisco comezou o seu discurso.
- Excelentísimo
señor presidente do ghoberno, Don Antonio Soto, ilustrísimos conselleiros,
compañeiros presidentes...
As dúas primeiras fileiras tiñan cadeiras
tapizadas de veludo, traídas do salón nobre do pazo provincial. De alí para
atrás había varios centos de vulgares cadeiras de plástico branco.
- ...o
potencial aghrario e ghandeiro da nosa provincia queda demostrado nas
contundentes cifras que, ano tras ano...
O presidente Soto ollaba impasíbel. Non
aparentaba os case setenta anos que figuraban na súa biografía oficial. Calvo
cun recortado semicírculo de cabelo branco arredor do cranio, cun imperceptíbel
bigote gris. Traxe e garabata escura. Pasador co escudo da comunidade, unha
insignia redonda na solapa, xemelgos e reloxo de ouro, como os anteollos.
- ...o
indubidábel compromiso desta deputación cos homes e mulleres que manteñen vivo
o noso principal sector económico...
O presidente fora un arquitecto de moita
sona antes de meterse na política. Non se sabe moi ben por que deu o paso.
Moitos crían que tiña moito que ver coa súa antiga amizade cun antigo líder
estatal do partido. Era persoa tranquila e pouco amiga de grandes mudanzas.
Relixioso e tradicional, era un rumor nunca confirmado que pertencía a unha
desas organizacións integristas que exercen un control absoluto na vida dos
seus membros.
- ...que
hai pois máis ecolóxico que manter poboación no noso agro? Esa debe ser a
prioridade de toda política que procure o progreso para o noso país...
Un dato para abondar na rumoreada
adscrición integrista do presidente eran os seus nove fillos, dos que polo
menos cinco ocupaban cargos importantes, ben na administración, ben en empresas
fondamente vencelladas con ela. Por iso don Francisco tiña especial coidado en
dar unha imaxe ben distinta á realidade de farras e mulleres. E iso era o único
que fallaba nos seus calculados planos para aquel día tan especial. Dona Rosa
seguía quen sabe onde.
- ...a
posta en marcha de estruturas de comercialización que simplifiquen o camiño
entre produtores e consumidores, a creación de consellos reghuladores...
Soto procuraba sempre colaboradores cun
mesmo perfil: eficientes profesionais, de vida familiar sen tacha. Xente
competente e da que non houbera nada que dicir. Pertencer ao seu mesmo grupo
relixioso era sen dúbida unha avantaxe máis, pero don Francisco non estaba a
tempo, aínda que quixera, de subir ao carro. Pero iso non era unha traba para
que a deputación levara meses subvencionando moi xenerosamente as actividades
que tiñan algún vencello coa pechada organización.
- ...
por iso a deputación que me honro en presidir seghue a apostar polo rural, coa
nosa ghranxa provincial experimental, co arranxo da infraestrutura viaria...
A mensaxe estaba a quedar clara. Que
mellor conselleiro de agricultura que Barreiros, tan implicado no
desenvolvemento agrario? Todos ollabamos para a face imperturbábel de don
Antonio Soto. Nada deixaba ver que pensamentos pasaban pola súa cabeza monda
naquel momento. O conselleiro case defenestrado, en troques, suaba frío. El si
se estaba a decatar que don Francisco apostaba forte e decidido. Eu coidaba que
era cousa feita. Comecei a pensar no próximo traslado á capital autonómica.
Habería que buscar apartamento, facer mudanza, ir coñecendo xente. Porque sen
dúbida o xefe querería verse rodeado da mesma equipa que o axudara até aquí.
Algo xa deixara caer nos días previos, mentres vía cada vez máis próximo o
grande momento.
- Paréceme que moi axiña vai haber
cambios, así que ídevos preparando!
O discurso tiña que estar a causar un
grande efecto. E escribírao eu. Xa sei que don Francisco non era moi dado a
agradecementos, mais aquilo era moi especial. O último empurrón. O xefe perdeu
os papeis un momento e parou de falar. Fíxose un espantoso silencio de catro ou
cinco segundos, pero das ringleiras de atrás xurdiu un aplauso que se foi
estendendo por todo o auditorio. Tamén o presidente aplaudiu. Á fin puido
volver ao fío.
- ...precísanse
accións coordinadas entre todas as administracións implicadas, dende a local á
estatal, que deben ser dirixidas e executadas dende o chanzo autonómico porque
é aquí onde radican as máis importantes competencias...
Ahá! Un dos puntos clave do parrafeo. Un
dicir e non dicir. Unha franca declaración de intencións que, sen embargo, non
deixaba translucir demasiada ambición. O presidente autonómico asentiu case
imperceptibelmente. Que satisfacción para min! Aquilo ía sobre rodas.
- ...e
non me vou estender máis. Todos somos conscientes da importancia de avanzar, de
modernizar e por en vangharda o traballo, o esforzo e o sacrificio dos nosos
homes e mulleres. Moitas ghrazas.
Os aplausos marcaron o nivel de aceptación
do discurso. O propio Soto púxose en pé, e logo todos os demais, nunha pechada
ovación. Don Francisco descendeu satisfeito e pagado de si mesmo do estrado e
foi directamente cabo do primeiro mandatario, quen lle estreitou moi
efusivamente a man. Logo mirou para onde eu estaba e chiscoume un ollo. Era a
primeira vez que mostraba agradecemento cara a min!
O presidente do goberno subiu ao estrado e
desfíxose en eloxios.
- Despois
do importante e acertado discurso do meu grande amigo Francisco Barreiros, creo
que pouco máis resta por dicir...
O xefe sentou na súa cadeira e estirou as
solapas da americana varias veces. Estaba eufórico, véndose coa pasta de
agricultura na man. De cando en vez volvía a cabeza cara un lado e cara o
outro, sorrindo e respondendo aos xestos compracentes que xurdían do público.
- ...precisamos
xente comprometida cos problemas do medio rural, coas inquedanzas dos que
traballan de sol a sol nos nosos campos...
Estábao a deixar claro. Os sinais eran
máis ca evidentes. Respirei fondo, fortemente relaxado e aliviado.
- ...declaro
pois inaugurada esta exposición gandeira provincial.
Coidei que non tiña por que andar de
satélite do grupo de autoridades na súa visita aos postos e máis á parada de
gando selecto. Despois de todo, o groso do meu traballo estaba feito.
Achegueime á cafetaría para tomar unha cervexa. Alí atopei a Mamen.
- Parabéns. Foi un bo discurso. Creo que o
teu xefe vai saír axiña no diario oficial.
- Grazas. A verdade é que estou moi
satisfeito. E ti, non deberías estar traballando?
- Mentres andan dando voltas pola feira só
hai que gravar imaxe. Aproveitarei antes do xantar para recoller declaracións.
- Queres que che consiga a don Francisco?
- Non fai falla. Xa o teño comprometido.
A cervexa estaba ben fría e sentoume
marabillosamente. Os nervios secáranme a boca.
- Polo que vexo, conseguiches entrar na
produtora do Ideal.
- Si. Ti tes a túa parte de culpa.
- Só llo comentei ao xefe. Supoño que
sería cousa del. Temos que quedar un día para tomar algo e contarnos cousas.
Non sei nada da túa andaina pola capital.
- Si, claro.
Apuntou o seu número de teléfono no
caderno de notas e arrincou a páxina.
- Chámame cando queiras e vémonos.
- Claro.
Sem comentários:
Enviar um comentário