X
Dende logo, acudín ao xulgado en busca
dunha explicación. Se eu estivera no lugar de Chus, tería feito todo o posíbel
para desfacer aquela lea monumental. Pero ela deixárame tirado.
- E eu? De noite vestida como estaba e sen
un can para pillar un taxi? E todo por culpa túa. Non podías ter mercado
condóns?
- Mira como teño os pulsos por mor dos
putos grillóns! Esta non cha perdoo na vida!
- Pero safaches, non? A proba é que aquí
estás.
- Hostia, Chus! Pois non ía morrer
amarrado á cama!
- Entón tampouco foi para tanto.
- Como que non foi? Ti toleaches?
Ela estaba máis seria ca de costume, se
iso é posíbel, e decateime axiña que non quería saber moito máis do asunto. E
tiña bemoles, botarme a min a culpa.
- E o que pasei eu, iso non ten
importancia?
- Polo menos non estabas amarrada.
- Xa. Sen teléfono. Sen ninguén a quen
chamar. De noite polas rúas da cidade vestida de puta. Vaia papeleta, non cres?
- Tamén safaches, non?
- Tiven que agardar toda a noite nunha
sala da estación do tren até que abriu o xulgado e puiden vir buscar un xogo de
chaves da casa que tiña no despacho.
- E non podías despois ir valerme a min?
- Non quería nin verte diante. E agora
tampouco. Quero que me fagas o favor de devolverme o meu bolso e o teléfono. O
demais non me importa. Ah! E é mellor que non nos volvamos ver.
Tireille o bolso de mala maneira enriba da
mesa e dei media volta, irado e ofendido. Por min podía ir á merda.
Os do servizo de publicacións estaban ao
borde do infarto e o asunto chegara xa á atención do xefe. Aquela mañá tiven
que presentarme diante del, e a primeira sorpresa foi que substituíra o mapa da
provincia de mil oitocentos setenta e cinco que presidía o despacho por outro
xigante da comunidade autónoma. Non estaba particularmente anoxado, aínda que
eu xa fora posto en antecedentes acerca do sucedido o día anterior, cando o do
cartaz alusivo á última da semana.
Preguntou primeiro pola miña ausencia, que atribuín a unha forte dor de cabeza,
e logo lembroume que debía facer canto antes o prólogo do libro, pois o retraso
xa ía custar unha morea de cartos en horas extraordinarias na imprenta.
- Así que veña, a traballar, cona! E que
saia unha boa peza!
- Xefe, a verdade é que o tema é moi pouco
literario.
- Caghoental,
Loureiro! De que estamos a falar?
- Dun touro.
- Pois iso. Ghandería. Agricultura. O máis
importante que ten o país. Cantos poetas non terán cantado as marabillas do
rural. Pero claro, os rapaces da cidade non vistes na puta vida unha vaca!
- Xefe, eu non son da cidade, e na casa
dos meus pais hai gando.
- Entón cal é o problema?
Fernando explicoume a urxencia do asunto.
A exposición gandeira provincial, coa que se ía inaugurar o novo recinto feiral
promovido pola deputación, tiña este ano unha importancia crucial. Rumoreábase
que o conselleiro de agricultura do goberno autonómico caera en desgraza a
causa de estrañas manobras partidarias, e que o seu cese estaba próximo. Don
Francisco decatárase da ocasión que se presentaba, e con a penas quince días de
antelación propúxose converter a exposición gandeira nun flamante escaparate,
non da actividade pecuaria provincial, senón de si mesmo. Convidara a todo
canto persoeiro se lle puxo a tiro, tanto civil como militar ou eclesiástico,
comezando polo goberno en pleno, e presionaba a todas as empresas que tiñan
algo que ver co sector para que montaran postos no recinto. Incluso se
contrataron unha morea de cortes publicitarios na televisión, e dispuxéronse
autocares dende todos os concellos afíns da provincia para desprazar a todo o
público posíbel. Sabía que ao presidente do goberno lle gustaban enormemente os
baños de masas, ou, como el dicía, os rabaños
de masas e non ía quedar curto. Os de publicacións andaban do revés
tratando de sacar para aquel día todos os títulos relacionados con temas
agropecuarios, uns dez libros, que estaban entregados pero pendentes de
publicación. O máis importante ía ser a biografía de Tom Jones, que levaría por título A historia dun campión. Despois de todo, aquel becho fora o
investimento máis importante realizado pola deputación polo que respecta á
gandería dende que Don Francisco era presidente.
Agora xa tiña máis datos. O campión non
importaba grande cousa. O argumento a destacar debía ser a forte aposta do xefe
polo campo, demostrada a través do pulo dado á granxa experimental e bla, bla,
bla... Así que busquei as memorias que puntualmente presentaba o responsábel do
negociado, que ninguén lera xamais, e púxenme de contado á tarefa. Á fin puiden
entregar aquela mesma noite ao desesperado coordinador de publicacións case
oito mil palabras. Un bo traballo.
Os días seguintes foron frenéticos. Houbo
que facer as cuñas radiofónicas do evento, as notas de prensa e, o peor de
todo, o discurso do xefe. El mesmo me entregou un par de follas manuscritas de
imposíbel caligrafía coas ideas principais que quería incluír no parlamento de
inauguración da exposición, e a partires de aí elaboramos e reelaboramos até o
esgotamento, de tal xeito que o día anterior, ás doce da noite, aínda estabamos
dándolle voltas. A idea básica era a de postularse como conselleiro do ramo. Ou
sexa, son o mellor para o posto, pero non estou dicindo que me estea postulando,
nada máis lonxe da miña intención. Pero, aínda así, aquí estou eu.
Ademais do meu traballo, tamén tiven que
botarlles unha man aos de protocolo. Por exemplo, xestionando unha entrevista o
máis longa posíbel na televisión local para o xefe.
Telecidade era un medio de comunicación
que escapaba en certa medida ao noso control. Iniciativa dun veterano
presentador da televisión estatal que, no seu declive como astro do medio,
buscou un acubillo respectábel na propiedade de televisións locais en varias comunidades.
Politicamente oposto á cor dominante na provincia, mantiña un certo pulso co
presidente e máis cos alcaldes dos concellos aos que chegaba o sinal. Primeiro,
tratando de que os informativos tivesen unha certa obxectividade, e que desen
voz aos maltratados opositores. A idea de dedicarlle a don Francisco unha parte
importante do programa da noite, presentado por un combatente xornalista
ferozmente antibarreirista, sen
dúbida ía ser mal recibida, pero aínda así había que intentalo. Gueimóndez púxome
ao día, xa que eu nunca sintonizaba Telecidade.
- Non o sabes? Agora o programa da noite
preséntao unha rapaza nova. Non lembro como se chama.
- Xa non está o ghicho aquel de barbas?
- Non. Parece ser que lle deu un infarto
e, entanto, puxéronlle unha substituta.
Pois ben. A ver se tiñamos sorte. Acudín á
sede da emisora, unha nave industrial situada nun polígono da cidade.
Atendéronme na recepción, onde me dixeron que tería que agardar unha media
hora, xa que a presentadora do programa estaba a gravar algo en exteriores.
- E como se chama?
- Carme Caride.
Non me soaba de nada. Collín unha revista
e agardei. Ao pouco vin a través das vidreiras un automóbil cos rótulos da
emisora que aparcaba. O sol non me deixou percibir as caras do rapaz e a rapaza
que saían do coche. Entrou primeiro o rapaz, cunha cámara na man, e despois a
rapaza. Era Mamen!
- Ti?
- Iago? Canto tempo! Ven aquí e dáme dous
bicos. Que é da túa vida?
- Pois xa ves. Sigo a traballar na
deputación. E ti?
- Fago televisión. Non me viches?
- En Telecidade?
- Si. E ti que fas por aquí?
- Veño falar cunha tal Carme Caride. A que
presenta o programa da noite.
Mamen soltou unha gargallada.
- Pois xa estás a falar con ela.
- Ti?
- María do Carme Louzao Caride. Mamen non
sona nada ben en televisión, así que xa ves...
Fiquei sen palabras. Se ben me sería máis
doado convencela de dedicarlle un programa ao xefe, sabíame mal metela naquel
sarillo. Acompañeina ao estudo do seu programa, que quixo ensinarme,
explicándome con detalle como se facía a realización. Sentamos no set e entrou
en materia.
- Ben. E logo que querías?
- Xa che dixen que sigo a traballar na
deputación. Como saberás, a semana que ven inauguramos a exposición gandeira
provincial, e a don Francisco gustaríalle que lle fixeras unha entrevista en
profundidade. Eu non che debería contar isto, pero quere aproveitar o evento
para darlle un pulo á súa carreira política, e precisamos darlle toda a
promoción posíbel.
- Entendo. Quere ser conselleiro de
agricultura, non?
- E ti como sabes...?
- Iago, non me tomes por parva. Salta á
vista que o teu xefe é un home con aspiracións ben máis altas. Pero xa sabes
que nesta casa non é moi ben recibido, non?
- Si. Bah! Déixao. Tiña que intentalo.
- Non pasa nada. Ademais, eu vou estar
aquí catro días. Só fago unha substitución e despois, quen sabe. Ao mellor
podiades devolverme o favor.
- Como?
- Buscándome traballo nalgún medio afín.
Ao mellor na produtora do Ideal. Sei
que teñen un proxecto de televisión.
Eu non sabía nada, e tampouco podía prometerlle
grande cousa. Como moito, diríallo a don Francisco a ver que se podía facer.
Abondoulle.
- Metereino o xoves pola noite. É o día de
máis audiencia.
- Non sería mellor o venres, máis preto da
inauguración?
- Non. O venres gáñanos a televisión
autonómica por goleada. Non o vería case ninguén.
Quedamos así. Díxenlle ao xefe que Mamen,
ou Carme Caride, accedía a darlle un bo tratamento o xoves á noite pero que en
troques había que facer algo por ela. Non puxo problemas. Seguro que habería
onde metela e, se era no Ideal,
mellor. El mesmo falaría con Mamen despois do programa.
Vin aquela mesma noite o programa na casa
da Tareixiña, logo de autoconvidarme a pinchar algunha cousa acompañada dunhas
cervexas. Mamen facíao moi ben, víase desenvolta de enfrontaba perfectamente
calquera tema. Entrevistou primeiro á presidenta da asociación de amas de casa
da cidade, deu paso á actuación dun grupo de cámara do conservatorio, presentou
unha exposición de pintura e seguiu entrevistando xente até a fin do programa.
- Ti xa o sabías?
- O que?
- Que Mamen traballa en Telecidade.
- Non. Sabía que ía volver, pero non me contou
nada do traballo. De todos xeitos, pouco lle vai durar.
- Pouco.
Non lle contei nada acerca do trato que
fixeramos aquela mañá. A min pareceume que non era a mesma rapaza coa que
compartira apartamento. Víaa cambiada, máis vital. Ademais sorprendérame a
facilidade coa que tirara do fío e me propuxera o troco de favores. Mamen non
adoitaba ser tan directa. O tempo pasado na capital debía terlle sido moi
instrutivo.
- Tareixa. Ti nótala moi cambiada?
- Leva o cabelo curto e está moi
maquillada. Pero iso debe ser cousa da televisión.
- Non me refiro a iso. Ti falaches con ela
por teléfono todo este tempo. Non che deu a sensación de que é unha persoa
distinta?
- Non. Por que o dis?
- Por nada.
-
Ben. E isto foi todo por hoxe. Gustaríanos contar con todos vostedes mañá, de
novo, na Noite Aberta, este agradábel paseo nocturno pola cidade
da man desta, a súa televisión. Telecidade. Quedan agora co cine clásico para
ver A grande ilusión do realizador
francés Jean Renoir. Un histórico filme que paga a pena gozar. Deica mañá.
Tareixa espreguizouse e convidoume moi
directa a marchar. –Eu voume deitar, e non teño intención de levarte comigo,
así que xa sabes, porta!-. Marchei e apeteceume dar unha volta polas rúas do
centro da cidade. Ía unha noite clara de luar, aínda que unha miga fría. De
todos os farois penduraban bandeirolas anunciadoras da exposición gandeira con
grandes letras vermellas sobre fondo verde. Entrei no Central e pedín un
descafeinado de máquina con leite. Morno.
XI
Cando concluíu que non aturaba ao seu
home, Rosa entendeu que tiña que facer algo na vida. Aquela existencia de
mantida de luxo equiparábaa, no seu maxín, a todas aquelas mulleres ás que
Francisco retribuía, dun ou doutro xeito, para telas preto, cunha única
diferenza, ela xa non tiña que entregar o corpo a cambio.
Non levaba a conta de cantas, nin cando.
Íanlle chegando rumores, confidencias, algunha advertencia, e abondaba para
facer unha composición próxima á realidade sobre as aventuras do sátiro. Porque
non a enganaba só a ela, senón tamén ás amantes máis ou menos estábeis, pero
todas de usar e tirar, frecuentando a un tempo o sexo mercenario nos lugares de
máis alto standing da cidade e aínda en sórdidos clubs de estrada. E máis,
dende que a dúbida sobre a súa fertilidade o liberara de calquera disimulo
sobre a súa axitada e promiscua vida extramatrimonial.
En Londres, polo menos, a ferida non doía
tanto. Estaba lonxe, como mínimo, da maledicencia da xente. Pero tamén, e isto
era o máis importante para ela, non tiña que mirarlle aos ollos a aquel home
que era o maior erro da súa vida. Non quixo pagarlle coa mesma moeda, e non por
un posíbel sentido da integridade, senón porque non se atopaba con forzas nin
gañas e, ademais, ansiaba sentirse libre de ataduras.
Gustaríalle, tamén, tirarlle á cara os
cheques que recibía puntualmente dunha das empresas familiares, e para iso
tería que pórse a traballar. Cun título de socioloxía nas mans, cursou un
master en investigación de mercados ao tempo que perfeccionaba o seu nivel de
inglés, e con tempo e asertividade logrou autoconvencerse de que podía comezar
unha nova vida.
Elaborou un limitado currículo que
complementou con adornos que xulgou necesarios, pois os seus trinta e tantos
anos casaban mal coa total inexistencia de experiencia laboral. As primeiras
semanas non foron demasiado ben, pero as entrevistas de traballo remataron por
chegar e, á fin, obtivo un posto nunha empresa de sondaxes comerciais que
traballaba para unha importante cadea de supermercados.
O traballo consistía no testeo de novos
produtos, a elaboración de estratexias para introducilos de forma correcta nos
mercados e auditar as respostas do público para detectar posíbeis fallos de
deseño. Integrada nunha pequena equipa, boa parte da actividade transcorría
fora da capital en calquera dos supermercados distribuídos por Inglaterra e
Gales.
O soldo permitíalle vivir ben, sen
demasiados luxos, e pasado o período de proba puido por fin devolver o primeiro
talón mensual. Aos poucos días recibiu unha chamada de Francisco.
- A ver! Que? Sóbranche os cartos ou?
- Non, pero non quero nada máis de ti. Non
o preciso.
- E de que vives? Do puto ar?
- Do meu traballo.
- Anda, non me fagas rir. De que traballo
nin que carallo! Éme ighual o que faghas
aí, pero non quero que dighan que non manteño á miña muller.
- Diso tamén quero falar. Paco, quero o
divorcio.
Houbo unha longa pausa do outro lado da
liña telefónica. Francisco Barreiros non agardaba unha sorpresa así. Para el,
pagarlle os gastos a Rosa non era máis ca unha estratexia. Mentres ela se
acomodara e dependera da asignación mensual, non había perigo de ruptura e o
conseguinte escándalo. Pero agora ficara sen saber reaccionar.
- Paco, estasme oíndo?
- Mira, o que faghas aí en Londres
téncheme sen coidado. Como se te vistes de pendangha e saes a facer a rúa. Pero
aquí non vai haber divorcio ningún, entendes? Vaino metendo na cabeza! E se non
métocho eu a gholpes.
- Paco, que dis?
- O que oes! E mañá volvo enviar o talón,
e cóbralo, e todo seghe coma sempre. Como me teña que presentar eu en Londres
habémolas ter moi ghordas ti e máis eu!
Colgou o teléfono, anoxado. Respirou fondo
e foi recobrando o control. Non era parvo, e sabía que tiña cometido un erro.
Non era aquela a mellor forma de solucionar un problema que, nas mans
axeitadas, podía tronzar as súas aspiracións. Pero agora xa estaba feito e non
había marcha atrás. Pensou que ao mellor había sorte e a ameaza xurdira efecto.
Dispuxo o envío dun novo talón, que volveu
rexeitado ao cabo dunha semana. Para entón, estaba totalmente entregado á
organización da exposición gandeira provincial, aquel trampolín para a súa
ambición de poder. Decidiu que cada cousa tiña o seu tempo, e que o primeiro
era o primeiro. Despois xa vería como trataba con Rosa.
Aquela noite acudía por vez primeira a
Telecidade. Aquela emisora era unha espiña cravada, un elemento discordante no
harmonioso control dos medios de comunicación provinciais que tantos servizos
prestaba á súa estrutura de poder. Sabía que aquela excepción no veto que a
televisión mantiña cara el era cousa de Loureiro, porque segundo lle comentara
era coñecido da nova presentadora, pola que ademais había que facer algo. Tiña
que aproveitar a ocasión e despregar todos os artefactos de sedución política
aprendidos nos últimos anos. O obxectivo era convencer á xente para que acudira
á exposición.
O propio dono telefonara aquela tarde á
emisora para pedir explicacións sobre a presenza do presidente no programa da
noite. Mamen argumentou que a ela non lle dixeran nada de vetos nin
prohibicións. Sabía que a liña editorial non era favorábel aos que ocupaban o
poder, pero preguntábase se non era máis ético manter un certo equilibrio,
abordar os temas con obxectividade. Ademais, suspender agora a entrevista
implicaría darlles argumentos para falar de censura. O propietario non tivo
máis remedio que aceptar.
- De todos xeitos, dálle caña! Non o
deixes saír vivo do plató!
- Farei o que poda. Non se preocupe, xefe.
- E para outra vez, se hai unha outra vez,
quero que se me consulte antes de decidir unha cousa así!
- Por suposto, perda coidado.
A Mamen quedoulle claro que non habería
outra vez. Por tanto, decidiu que ofrecería o trato máis amábel posíbel ao
presidente, e agardaría que Iago ou quen fora o que tivera que tomar decisións
soubera estar á altura.
O seu antigo compañeiro ofrecéralle algúns
consellos:
- Fala ti todo o que podas, faille
preguntas sinxelas e non o deixes meterse en sarillos. Non o anoxes baixo
ningún concepto. Este home sen papeis é un auténtico desastre. Canto máis
desenfadado sexa o tratamento, mellor.
- Non te preocupes. Déixame facer a min,
xa verás que non te hei decepcionar.
Dende logo que non. A conversa transcorreu
da mellor maneira posíbel, cun ton íntimo e nada envarado. O presidente
atopouse a gusto e rebaixou o nivel de vulgaridade a extremos nunca vistos
polos que o coñecían. Ao rematar, estaba exultante.
- É a mellor entrevista que me fixeron
nunca, Carme. Non sei como agradecercho.
- Ben, Loureiro xa sabe...
- Ah! Non te preocupes. Iso está feito. Eu
falaba de convidarte a unha copa.
Sem comentários:
Enviar um comentário